Zindagi jaisi hai waisi dikhaa bhi kare..

Zindagi jaisi hai waisi dikhaa bhi kare..
Naaraaz ho mujhse to shikwaa bhi kare..

Dard ho to maange na dawaa mujhse..
Dukh ho to mujhse baantaa bhi kare..

Ye kya ki baithi rahi chupchaap khud ko kosti..
Koi pathar ho seene par to aah bhi kare..

Maano baadalon ko de chuki baarishon ki pyaas..
Kirkiri ho aankhon mein to khud roya bhi kare..

Hairaan huun main..

Itni baar dil qatl -e- aam hua hai..
Dhadakta ab bhi hai, hairaan huun main..

Itni baar bikke hain gair ke haathon hum..
Keemat ab bhi hai, hairaan huun main..

Nabz utha ke dekho koi harkat nahi baaki..
Zindagi ab bhi hai, hairaan huun main..

Kasam -o- wafaa kab ke bichhad gaye par..
Rasm ab bhi hai, hairaan huun main..

Mukammal hue hain jazbaat ke samandar..
Kahaani ab bhi hai, hairaan huun main..

Yaaron mujhe le chalo ek naye jahaan mein..
Ye jahaan ab bhi hai, hairaan huun main..

Do minute ka maun..

Mazdoor ke ghar kahaan bachche paida hote hain..
Mazdoor ke ghar bas mazdoor paida hote hain..

Tu aaye..

Mujh mein ho shaamil ki mujh par shaayri ka rang aaye..
Ho shaamil yun ki mujh ko jeene ka dhang aaye..

Ho itna kareeb ki tujhe pukaarna na ho..
Main kahin bhi mudduun tu manzil tak sang aaye..

Ho chaahe suuni suuni duniya bhar ki raahein..
Tu saath ho to tanhaayi mein bhi tarang aaye..

Hain aadhi adhoori saanson ki ladiyaan sabhi..
Tu muskraaye to zindagi mein zindagi si umang aaye.. 

Doob jaayein hum paagalpan ki hadd mein..
Ishq par suroor aaye to aur bhi malang aaye..

yahaan wo baat kahaan..

Koun puchhega dil ka haal yaahaan..
Ye shehar hai yahaan wo baat kahaan..

Jaam-e-dil bezaar hai aur dard se labrez hai..
Dua mein bhi toh nahi milti dawaa yahaan..

Koi rasam chaahta hai.. koi sirf jism se khush hai..
Koun chaahta hai sachchi kasmein yahaan..

Shor rehta hai duniyabhar ke bazaaron ka..
Bajti hain kaanon mein wo shehnaayiaan kahaan.. 

Aasmaan se jo girta hain wo dikhta nahi..
Aankhon se jo girta hai koun dekhega yahaan..

Tukur tukur dekhe..

Tukur tukur dekhe chaand..
Maathe par zulfon ki athkheliyaan..

Soti thi raajkumaari kachi neend mein..
Purwaai ka jheena jhalti thi pariyaan..

Haath mein kangna chamakta tha reh reh kar..
Ghungruu mund they muskuraati thi baaliyaan..

Dupatta badmaash, palang se ladta gaya..
Raat ko bhool gaya din ki yaariyaan..

Sapne mein shayad bhanwra chhed raha hoga..
Sote sote maathe par chad rahi thi tyoriyaan..

Raat ki raani mehkti rahi halki halki..
Sheetal si chaandni phir sunaaye loriyaan..

Suraj halke se bola, chalo chaand miyaan, ab meri baari..
Chaand chal pada, mann hi mann dete hue gaaliyaan..

Tukur tukur dekhe aaftaab..

Neend to khul gayi raajkumaari ki..
Baaki hai magar palkon ki choriyaan..

Koun jeeta hai yahan khud apne vaaste..

Koun jeeta hai yahan khud apne vaaste..
Zindagi jeete hain hum rishton ke liye..

Din kaat lete hain sooraj se udhaar maang maang kar..
Zara si roshni ki khaatir waqt ko kishton mein jiye..

Dard puraana, dawaa jaan se zyaada mehengi..
Shikwa bhi tha magar honth khud-ba-khud sii liye..

Ghar hai, rooh aawaara phirti hai magar..
Khud se rahi bewafa, sabhon se laakh waade kiye..

Humnaam kyun hamaare hum se zyada piyen..
Ek kash zindagi, dhuen mein dhoond ne ke liye..

Rozgaar ki niyat bhi kaisi hoti hai doston..
Kaarobaar khoon paseene ka, do kaudiyon ke liye..

Dekho Naa.

Gehra rahi hai raat dekho naa..
Raat ke jhoolne pe nanha chaand.. dekho naa..

Waqt leta hai chhat pe bistar lagaa kar..
Hogi aaj khaas lamhon se mulaakaat .. dekho naa..

Muunh mein mishri ki rakh ke goliyaan..
Pariyon ki baatein karte hai gulaab.. dekho naa..

Jaate jaate raat ke jugnuon ki sharaarat..
Tanhaayi ko kar gaye sharaab.. dekho naa..

Samete hai khud mein kahaaniyaan kayi..
Baadalon ke jhurmut, zindagi ki kitaab .. dekho naa..

Taaron ki chhaon mein yaadon ki mehfil..
Khwaabon ke kaafilay kar gaye betaab.. dekho naa..

Chal phir se banaate hain..

{claps, claps, claps}

Tum jiyo 'hajaaron' saal saal ke din ho.................
stupid..
idiot.. ye kya kiya ..
maine itni mushkil se banaya tha..
pata bhi hai kaise banaate hain..
toot bhi gaya
:(
kya yaar..
tu chain se khada nahi ho sakta kabhi..
saara cake khraab kar diya..
uff
shut up..
baat mat kar mujh se..
such a restless duffer..
kya kiya tune..
dekh..
theek bhi nahi hoyega ab..
tu hi kaat le isse ab..
main nahi aa rahi..
...
..
.

Ruk
ruk yaar..
Kahan jaa rahi hai..?
tera dimaag kharaab hai..?
aaj bhi ladaayi karegi..
Hadd ho gayi..
maine jaanboojh ke giraya kya..
bol.. bol naa..
tu idiot..
tu stupid..
Achha dekh sorry..
tune bahut mehnat ki hogi na..
maine sab kharaab kar diya..
sorry..
achha bata.. kya kya daalte hain isme..
flour..
butter..
chocolate..
aur?
main help karta huun teri..
tu meri help kar na..
please aaja..

Chal phir se banaate hain..

Nazar utha bhi paaun main..

Jinse dil, dil hi dil mein baat karta ho..
Wo yun saamne aa jaayein, to baat kya karuun..

Unki aankhon mein hon anginat jawaab magar..
Nazar utha bhi paaun main, to sawaalaat kya karuun..

Sambhal sambhal ke rakhe hain kadam unki raah mein..
Badmaashi se haath thaam lein wo, to ehtiyaat kya karuun..

Khwaabon mein jo milte hai humein chaand ke zeene tale..
Bhari mehfil mein gar bulaayein, to mulaakaat kya karuun..

Jinse mil chuki huun main pehle kai baar bhi..
Unse phir mohabbat ki shuruaat kya karuun..

Jo meri rooh ko dubo de apne nigaahon ke samandar mein..
Wo mere shehar aaye to kahiye, barsaat kya karuun..

Geele geele chaand ka baadalon se yuun kehna..
Kaise aaun, ki dekh rahi hai ye raat, kya karuun..

Bhuul Jaaya Karo..

Chhota mota ho to bhuul jaaya karo..
Zara si udaasi ke liye gham ko na bulaaya karo..

Hoteen hai zindagi mein majbooriyaan kayi..
Na reh reh kar aasmaan sar pe uthaaya karo..

Gareeb ko dekho kaise patharon se khelte hain ..
Khilonaa tumhara tuut jaaye to na aansoo bahaaya karo..

Aas paas dekho, kis ka dil hai jo toota nahi kabhi..
Baar baar na mandir ke ghante bajaaya karo..

Koi dost naraaz ho to kya duniya se rooth jaaoge..
Ek tooti dosti ke liye na dil ko jang lagaaya karo..

Tum akele to nahi jo naakaam hue ho..
Apni nakaami ka bhi jashn manaaya karo..

Apni mushkilein hi hoti hain jo saath nibhaati hain..
Aur tumhaara koun hai khud ko samjhaaya karo..

Hota hai chalta hai duniya mein bahut kuch..
Rote rote na jeevan bitaaya karo..

Aadmi gar meetha hai to thoda zehriila bhi hai..
Chot gar halki ho to hans ke sehlaaya karo..

Chhota mota ho to bhuul jaaya karo..
Zara si udaasi ke liye gham ko na bulaaya karo..

-----
** Photo from the web. 

Maano raat ek kamra ho..

Maano raat ek kamra ho, aur chaand ek diya ho..
Hum hon aur kisi shararti bache ne..
baahar se taala band kiya ho..

Din bhar chaahe duniyaa dhoondaa karein humein..
Raat ko duniyaa mein sirf main aur mere piyaa hon..

Kehne ko dil mein ho bahut kuch magar..
Hothon ne ye kaam aankhon ko diyaa ho ..

Baadlon ka bistar ho taaron ki chaadar ho..
Mohabbat ke lams ne humein phir maasoom kiyaa ho..

Ek gilaas mein neeli jheel utri ho poori ki poori..
Ek ghoont samandar humne bhi pii liyaa ho..

Khaamoshi ka ek ek qatra aaine mein simat aaye ..
Har pal mein ek sadi ko humne jiyaa ho..

Kahin yaadein puraani hain..

Bikhri tanha boondon mein mohabbat ki kahaani hai..
Kahin seela seela din hai, kahin raat ki nishaani hai..

Baarish baras baras ke gaati hai virah ke raag..
Kahin mrig-trishna si hook hai kahin maasoom si jawaani hai..

Kaale baadlon ko bhedti ye gagan chumbhi khwaaishein..
Kahin sahiba udaas hai kahin raanjhe ki heer diwaani hai..

Dil ne bhi thaame hain kai sulagte saavan..
Kahin mausam rusvaayi ke kahin aankhon mein paani hain..

Kaajal failaa hai aaj geele thehre aasmaan mein..
Kahin waqt ki rawaani hai kahin yaadein puraani hain..

Aisa kaisa hota hai..

Aisa kaisa hota hai ki pyaar bikhar jaata hai..
Kal jinki jaan they hum aaj ajnabi kehlaata hai..

Kal jiske aangan mein mehakte they gulaab ban kar..
Aaj mujhe dekh ke khud murjhaa jaata hai..

Jiske saath baith nadiyon ko baadal bante dekha..
Wo waqt ke bahaav mein door bahaa jaata hai..

Uski aawaaz mein tab suraj bhi ghul jaaya karta tha..
Ab thandi aahon mein din guzar jaata hai..

Aisa kaise hota hai ki pyaar bikhar jaata hai..
Aksar waade maangne waala apne waadon se mukar jaata hai..

Phir musaafir hue hain raaste..

This poem is dedicated to Aruna P. Khot, a woman extraordinaire. A multiple-time cancer survivor, Aruna ji is an epitome of love and grace. Wherever she goes, her presence weaves faith and heals tired hearts.
 
Aruna ji, You are my story of hope. You have reaffirmed my belief that angels do exist.

Phir musaafir hue hain raaste..
Phir manzilon ko dhoond laana hai..

Phir paani mein utri hain kashtiyaan..
Phir samandar ke us paar jaana hai..

Phir udaan mein hain hausalon ke parinde..
Phir aasman se bhi aage jaana hai..

Phir haathon pe kheenchni hai nayi lakeerein..
Phir hawaaon ka rukh mod laana hai..

Phir suraj se badhaani hai dosti..
Phir chaand ko gale lagaana hai..

Phir baarish se dooriyaan mitaani hai..
Phir bheegte bheegte muskuraana hai..

Aaj sach suna ..

Aaj sach suna ..
Kadwa tha.. Meri hi tarah..
Hairaan tha.. Zindagi ki tarah..
Nukeela..
Magar jaane kyun chubhta nahi..

Aaj sach suna..
Sakht tha.. Dattaa raha..
Talkh tha.. Gurraata raha..
Maasoom..
Magar jaane kyun muskuraata nahi..

Aaj sach suna..
Bebas tha.. Dekhta raha..
Kasmasaaya sa.. Juujhta raha..
Maayoos ..
Magar jaane kyun dard se darta nahi..

Aaj sach suna..
Thak gaya tha.. Phir bhi aaya..
Sharmsaar tha.. Chhupta aaya..
Pareshaan..
Magar jaane kyun sambhalta nahi..

Aaj sach suna..
Soona soona sa .. Akela tha..
Tanha .. Sar jhukaaye..
Ungliyan dekhta raha..

Magar kyun phisalta waqt dekhta nahi..

Aaj sach suna..
Doston ..
Dukh hua..
Dard bhi..
Magar ek ajeeb sa sukoon aaya..
Hasraton ko .. Zara aaraam aaya..

Kyu Nahi ..

Ye kagaaz agar sach bolte hai to lagta kyu nahi ..

Tu agar mera hai to mera lagta kyu nahi ..

Tujhe pyaar hai to tere darpan mein jhalakta kyu nahi ..

Mera dard teri aankhon se chhalakta kyu nahi ..

Khud par yaqeen hai to tu kuch keh guzarta kyu nahi ..

Mera intezaar karta hai toh tu ye waqt badalta kyu nahi ..

Ye baadal jo tune mere naam ka bheja hai ..

Tera ehsaas inme se kabhi barasta kyu nahi ..

Is surmayi raat mein jugnu ke boonde bheje hai tumne ..

Phir chaand ye aasmaan nigalta kyu nahi ..

Meri baahon mein simat ta kyu nahi ..

Main kathputli si tere mahal mein saj gayi kai baar ..

Tu mujh mein jaan ban ke utarta kyu nahi ..

Tere mahal ki deewaarein bhi khokli hansti hai ..

Tu aata hai roz par isme theharta kyu nahi ..

Paani mein mera aqs puchhta hai meri hi pehchaan ..

Tere naam se mera naam sanwarta kyu nahi ..

Apna Des Yaad Aaya..

Aaj phir jab aasmaan khaali khaali nazar aaya ..
Aaj phir apne des ka chaand yaad aaya ..

Nahi hoti yahan phoolon mein koi mehak ..
Aaj phir des ka gulaab yaad aaya ..

Kaagaz ke kup mein ye chai pheeki lagti hai ..
Kulhad ki chai ka swaad lajawaab yaad aaya ..

Ugta hai yahan suraj sirf duty per jaane ko ..
Aaj pahadon ke beech se uthne wala aaftab yaad aaya ..

Muskuraane ko to log yahan bhi muskuraate hain..
Wo pet ke bal hansna aaj behisaab yaad aaya..

Koi kashti nazar aayi hai kya..

Khokle shabdon ko hansta dekh rahi huun.. 
Phir koi kahaani machal aayi hai kya..

Chaand aag sa tap rahaa hai aajkal.. 
Sitaaron ne meri shikaayat lagaayi hai kya..

Waqt ke bazaar mein kismatein bik rahi hain dekho.. 
Zindagi puuchhti hai, meri bhi boli lagaai hai kya..

Dikhaai nahi deta mujhe apna jism kahin par.. 
Akhbaar kholo, meri koi khabar aayi hai kya..

Diwaarein is ghar ki chhup chhup roteen hain.. 
Phir koi anaarkali chunwaayi hai kya..

Mujhe raat din shehron ka shor milaa hai.. 
Vasiyat mein meri bas tanhaai hai kya..

Sambhaale hai humne kai toofaan samandar mein.. 
Door koi kashti nazar aayi hai kya..

Jaane kaise kat rahi hai zindagi..

Laksh se hat rahi hai zindagi..
Jaane kaise kat rahi hai zindagi..

Jo aaya, pichhla hisaab maang raha hai..
Kitne hisson mein bant rahi hai zindagi..

Din, mahine, saal badhte jaa rahe hain..
Aur log kehte hain ghat rahi hai zindagi..

Waqt ke mujrimon ki talaash jaari hai..
Katghare ki safaayi rat rahi hai zindagi..

Nilaami hogi chaand ki, chaand ab ghar na aayega..
Raat ke aakhri ghoont gat rahi hai zindagi..

Border pe suna hai bambaari band ho gayi hai..
Kisi sanki fauji si phir bhi, dat rahi hai zindagi..

Sirf waqt hi to guzra hai..

सिर्फ वक़्त ही तो गुज़रा है हमारे बीच 
लम्हे वहीँ रखे हैं इंतज़ार में

दिन तो किसी तरह नक़द बिताया है
रात मिली है मगर उधार पे 

माना की तूने न वादा किया कभी 
उम्र सारी बीती है मगर श्रृंगार में 

किताबों में जो आसमान छिपा रखें है  
सूखे सूखे रहते है वो बरसात में

दिल के मकान की खिड़कियों में आज भी 
सहमा रहता है एक शहर तेरे प्यार में 

Ek dopahar..

पीपल की छाया तले मिली थी इक दोपहर.. 
मैली कुचली, कुछ सकपकाई सी दोपहर..

सर पर सूरज रख, दिन बेचने निकली दोपहर.. 
पेट सहलाती जीभ घुमाती , भूखी प्यासी सी दोपहर..

कब घर जाएगी, किरणों को क्या खिलाएगी.. 
यही सोचती, माँ जैसी थकी थकाई सी दोपहर..

शाम को बासी रोशनी कौन खरीदेगा.. 
पत्थर पे सर रख कर, खुद पथराई सी दोपहर..

बुझती आँखें मगर कड़क सुनेहरी.. 
ग़रीब के घर में चुंधियाई सी दोपहर..

चाँद पियक्कड़, मुँह औंधे गिर के सो जाएगा.. 
अपनी किस्मत को कोस्ती, कसमासाई सी दोपहर..

जब नई नवेली सुबह थी,
लोग पानी की 'मुँह दिखाई' दिया करते थे.. 
ये कहाँ दिन रात के जाल में अटकी,
खिस्यायई सी दोपहर.. 

Peepal ki chhaya tale mili thi ik dopahar..

Maili kuchli, kuch sakpakaayi si dopahar..

Sar par suraj rakh, din bechne nikli dopahar.. 

pet sehlaati jeebh ghumaati bhooki pyaasi si dopahar..

Kab ghar jaayegi, kirnon ko kya khilaayegi.. 

Yahi sochti, maa jaisi thaki thakaai si dopahar..

Shaam ko baasi roshni koun khareedega.. 

Patthar pe sar rakh kar, khud pathraayi si dopahar..

Bujhti aankhein magar kadak sunehri.. 

Gareeb ke ghar mein chundhiyaai si dopahar..

Chaand piyakkad, munh aundhe gir ke so jaayega.. 

Apni kismat ko kosti, kasmasaayi si dopahar..
Jab nai naveli subah thi,

log paani ki 'munh dikhaayi' diya karte the 

Ye kahaan din raat ke jaal mein atki,

khisyaayai si dopahar..

Ek rang..

Ek rang neela sa..
Ek saawan geela sa..
Aasmaani chaadar ka ..
Aansuon mein muskaan sa ..

Ek rang hariyaali kaa..
Kheton mein khushhaali ka..
Methi ki roti ki kaur sa..
Naye patton ki baur sa..

Ek rang peela sa..
Suraj jab sharmeela sa..
Sunehri yaadon ke aangan sa..
Baagon mein khilta yauvan sa..

Ek rang laal gulaal sa..
Kitaabon mein sukhaaye gulaab sa..
Dulhan ke maathe pe sindoor sa..
Intehaai ishq ke guruur sa..

Ek rang gulaabi sa..
Pehla nasha sharaabi sa..
Wo pehli pehli baaton sa..
Chaand aur chaandni raaton sa..

Ek rang manushyata ka..
Anekta mein ekta ka
Har rang alag, par satrangi sa..
Hazaaar dilon ki ek dhadkan sa..

kehne ki baatein hain..

kehne ki baatein hain ye ishq mohabbat..
koun mujhko mujhse ziyada chaahta hai..

dam nikle jis shakhs par, use bataao mat..
koun hai jo dil lagaane ki sazaa aur ziyada chahta hai..

vaade iraade hain sab kismat ke haath mein..
koun mujhe kam koun ziyada chaahta hai..

laaya tha sukh, khushiyon ke tokre bhar bhar ke..
aadat-e-gham ne kahaa wo mujhe ziyada chahta hai..

meri ghaflat ke hain kuch raaz-o-kisse mashhoor..
wo bhi naaraaz ho baitha jo mujhe sabse ziyada chaahta hai..

Pyaar do, Pyaar lo..

Har koi yahaan thoda thoda marr raha hai..
Kuch din hi sahi, zindagi udhaar lo..

Baat niklegi to phir wapis nahi aayegi..
Lafzon ke teer wapis tarkash mein daal do..

Seedhe seedhe milti mohabbat to kya baat thi..
Jahaan se mile, aapas mein baant lo..

Ye wo nahi daur ki Nanak, Buddh, Yesu aayenge..
Jo yahaan mile prem se, use hi khuda maan lo..

Aur kya hai zindagi ko jeene ka sabab..
Pyaar do, Pyaar lo..