April 14, 2012

ye kavita nahi, ek mulakaat hai ..



Kya karogi mujhse milkar..
Meri kalam chhuna chaahti ho..
Ya ye ungliyaan choom lena chaahti ho ..
Jo shabd nahi, tumhaare dil ki tees likhti hain ..

Mere saamne baith kar mujhse kuch puchhna chaahogi..
Par apne sawaalon ko odhaane ke liye, lafz dhoondti rahogi

Haathon se besabri se waqt rokna chaahogi ..
Par gale se nikalte nahi jo dard, unhe tatol_ti reh jaaogi ..

Main tumhaare saamne apne chehre pe haath rakh kar muskuraati rahungi ..
Tum mere saamne muskuraane ki koshish mein roti jaaogi ..

Aansoo ponchh kar, tum bag mein kuch dhoondne lagogi ..
Chupchaap mere saamne, ek chhota sa tohfa rakhogi ..

Ye kya hai? Main puchhungi
Tum pheeka sa muskura dogi ..
Wo tohfa khaamoshi se meri taraf sarka dogi ..

Main tohfa kholne lagungi .. Tum thoda sa darr jaaogi ..
Apni baahon se khud ko dhaadas bandhaaogi

Ek adhoora kissa .. Kuch toote dhaage ..
Do geele saawan .. ek khaali kaagaz ..
Aur ye chaand ki mitti ..
Itna kuch ek chhote se dibbe mein

Ye rakh lo, SKB .. tum Kahogi
Tumhaare kaam aayenge ..
Bahut dino se waqt ki almaari mein pade they ..
Tum likh lena inhe apni kavitaaon mein ..

Nahi to behte paani mein inka sanskaar kar dena ..
Apni inhi paak ungliyon se ..
jo mere dard ko kaagaz par likhne ka
anokha hunar jaanteen hain

ab tum mujhe dekh ke muskura dogi .. 
main tumhaare jazbaaton ke saagar mein kahin doob jaaungi ..

3 comments:

1CupChai said...

touching......will be an understatement! God Bless :)

Pranitha said...

What happened to my comment posted here...??

This is so precious for me Anu...will cherish it forever...thank you!!

Dayanand Arya said...

Aur un zajbaton ke sagar se ye jo moti apane nikala hai.... Uski ankho me pani to hai hi sath me gajab ki sondhi si khushbu bhi hai.